أكيـــــــــــد انت في السودان

لو بحثت عن خط (عبور) مشاة
أو (أمامك مدرسة) أو(منحنى)
في كل (العاصمة) ولم تجده ...
تبقى أكيد فى السودان
*****
لو إنت فى بلد فيهو سنه سابعة
وسنة تامنه ابتدائى…
تبقى أنت أكيد فى السودان
*****
لو (لبد) ليك شرطى (مرور) فى نهاية شارع (إتجاه واحد)
وخلاك لمن دخلت وجاك بى (دفتر إيصالاتو…(
تبقى أنت أكيد في السودان
*****
لو لقيت فى بلد ما فيهو (معينات البحث العلمى(
وكل يوم الجامعات تناقش (خمسين) رسالة دكتوراة
و(ميتين) رسالة (ماجستير(
تبقى أنت أكيد فى السودان
*****
لما تلاقى الترزي كاتب على باب المحل بتاعو
آية بتقول
) وفصلنا كل شئ تفصيلا) صدق الله العظيم …
تبقى أنت أكيد في السودان
*****
لما تخلص موضوع فى مكان ما،
وتجى تركب عربيتك
وتلاقى (المساحات) مرفوعه
عشان تعرف على طول انو فى واحد مسحها ليك
وح ياخد منك واحد جنيه …
تبقى أنت أكيد فى السودان
*****
لو قرأت الصحف فى 1987 أو فى 2016
عن (إنتهاء قطوعات) الكهرباء
ولقيت نفس الكلام فى صيف 2030 …
تبقى أنت أكيد فى السودان
*****
لو أهم (كبرى) فى عاصمة البلد
صيانتو عاوزة ليها (سنتين)…
تبقى أنت أكيد فى السودان
*****
لو توقفت (الحركة) إثناء ساعات (الذروة(
وإكتشفت أن السبب (كشه(
تبقى أنت أكيد فى السودان
*****
لو عدمت (التعريفة(
وكمان دخلت فى (ديون(
للإيفاء بنفقات (فراش) قريبك
الذى توفى إلى رحمة الله...
تبقى أنت أكيد فى السودان
*****
لو وجدت أن (ترخيص عربتك(
يساوى (ربع) قيمتها ….
تبقى أنت أكيد فى السودان
*****
لو تقدم إبنك (المهندس) لشغل وظيفة
وكان (الإنترفيو) عن (صلاة الجنازة(
تبقى أنت أكيد فى السودان
*****
لو عندك (الكلية) اليمين متعطلة
وعاوزين يشيلوها ليك
قامو (إستأصوا) الشمال السليمة
لأنو الدكتور كان ماسك الأشعة (بالمقلوب(
تبقى أنت أكيد فى السودان
*****
لو مكث (مرتبك) معك
) تلاته ساعات وإطناشر دقيقة)
هى الفترة من لحظة إستلامه من الصراف
إلى حين عودتك للمنزل...
تبقى أنت أكيد فى السودان
*****
لو فاز فريقك الذى تشجعه على الفريق الخصم
فى مباراة الذهاب 8/صفر
وخسر فى مباراة الإياب 12/صفر….
تبقى أنت أكيد فى السودان
*****
لو خشيت مؤسسة حكومية
ولقيت الموظفين مافي اثناء الدوام..
تبقى اكيد انت في السودان
*****
لو طلعت مستحمي و متريح
وماشي عرس
ودخلت العرس زي الكأنك كنت بتلعب كورة...
تبقى انت اكيد و اكيد في السودان
*****
لو لقيت مطعم وقدامو دورات مياه...
تبقى اكيد انت في السودان
*****
لو مشيت الحوادث
وقالو ليك
) لوعندك رصيد اضرب للدكتور لانو نايم (
تبقى انت اكيد في السودان
*****
لو لقيت اجنبي وعواطلي
وعندو صلاحية اكتر منك
والناس كلها تحترمو...
تبقى انت اكيد في السودان
*****
لو اعلنو عن 3000 وظيفة
ومشيت تقدم في اليوم الاول
وقالو ليك
)تعال بكرة لانو لجنة المعاينة ما اكتملت(
وجيت تاني يوم و لقيت التقديم قفل...
تبقى انت اكيد في السودان
*****
لو محتاج حاجة
ولقيت اقرب حتة تجيبا منها
على بعد 3 كيلو متر...
تبقى اكيد انت في السودان

بالله ياخوانا رايكم شنو في الكلام ده affraid

عاوزين التعليقات Basketball

وعاوزين الاراء دي حاجه بسيطه من حاجات كتيره

والله دي حاجات بسيطة عن الإشراقات والتحف البتحصل في سودانا الحبيب ...وإن شاء الله بديك قدرها من ..الأشياء البتحصل في السودان ...والتي من أطرفها ...إنو في ...واحد في حاضر عقد والناس متلمة والكبسيبة ...والماذون وبو العريس والعروس ....واسرة الزوجين ...المهم قالوا لواحد ..أقرأ لينا قرأن فما كان منه إلا أن أقرأ حتي وصل قوله تعالي( فإن طلقا فلا تحل له حتي تنكح زوجاً غيره)
بالله نحن مافي السودان ...العجيب ده ...ومن الملاحظ ياسيدة ناهد ..إن مسألة المرور والعربات اخدت خمسين في المية من موضوعك ...الظاهر ناس المرور منجضنك الله ينجضهم الليلية لاقوني ..

عدد الرسائل : 441 تاريخ التسجيل : 21/06/2008

والله يا ناهد ده الكلام الحاصل لكن نعمل شنو عشان الحال يتصلح
الضرائب وبندفع والعوائد المويه والكهربا كل ده بندفعه
لكن حكومة السجم دي ما بتصلح الحال بس فالحين يقولو ادفع ادفع
والله والواحد بيقه يخجل يقول انا سوداني
وبعد ده بندعو ربنا يصلح الحال ويحقق الامال

عدد الرسائل : 765 تاريخ التسجيل : 13/06/2008

كلامك صاح ميه ميه ربنا يصلح الحال يا رب

مشكورييييييييين على المرور والله ياعمنا نجاض شديد الترخيص بالجد يقطع قلب الزول الزول يشيل هم للترخيص والتأمين معقوله ياخوانا وكمان لو الواحد عامل شفت ويزوغ من الترخيص يقطعوا كل يوم ايصالات عربي وانجليزي بعدين ياخوانا غير كده كتيييييييييره الحاجات بس زي ماقالت اشواق ربنا يصلح الحال
هسي اليويمن دي المطره بدت يادااااااااااب الناس بيحفروا في الخيران معقوله بس زي التقول الخريف ده ماسمعوا بيه يطرشهم وجاء فجأه تجي ماشي انك على ثقه بتعرف الشارع تقع ليك في خور قال بيجهزوا للخريف بعد مابدا حتن بدوا يجهزوا والشوارع ماتعرف تطير وين وله تقبل وين بالجد احسن ياعمنا نوقف العربات ونمشي كداري دي زاااااااتها مابلد عربات ههههههههههههه بعدين العلاج تكون موته ودفنوك واهلك نسوك حتن الدكاتره يعرفوا انت كان عندك شنو تخيل هههههههههههههههه غايتو الله كريم علينا
مشكورين على المرور واتمنى مشاركة الجميع

رغم الكلام الكاتباهو دا ياباش ورغم الحقائق الكتيرة الواردة فيهو لكنو دا السودان وطن الاجداد وطنا الباسمك كتبنا ورطنا وطن المليون ميل وطن العزة والشموخ والكبرياء نهواهو في كل الظروف ولو بعدنا عنوا يوم نجيهو والحنان كلو دا فرنا ليهو نجيهو وكل الشوق في العيون تحكي ليهو عن شوقنا ليهو ولو ما مصدقاني يا باشا اسالي المغتربين عن حالهم كيف وهم بعيدين عنو اسالي ميسون وعاصم اسالي اسيا قاسم والحاج اسالي حسام ونهي اسالي وجدان وزهير اسالي كل المغتربين عموما دون فرز عن حالهم كيف ح يحكوا ليك عن شوقهم لي البلد والبلد هو الســــــــــــــــــــــــــــــــــــــــــــــــــــــــــــــــــــــــــــــــــــــودان وكيفن يكون الحال لوماكنت ســــــــــــــــــــــــــــــــــــــــــــــــــــــــــــــــــــوداني واهل الحارة ما اهلي وانا متاكد انو الكاتباهو دا ياباش من وراء قلبك وهو من اجل اصلاح الحال وليس من اجل السخرية بالبلد وانا واثق من كدة وربنا يحفظ لينا وطنا ويعلي من هامتو بين البلدان ومهما كان ومهما اتقال دا الســــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــودان ولي عودة ان كان في العمر بقية ولكم فائق الود وكل الاحترام

مشكووووووور ياسمؤال على المرور الكريم وبالتاكيد انا لمن بكتب الكلام ده مابسخر من البلد لانو بطبيعه الحال مافي بني ادم طبيعي بيسخر من وطنو لكن انا بسخر من الظروف والحاجات الغلط الحاصله فيه خت في بالك حتى لمن تسأل المغتربين عن شوقهم لي الوطن هم شوقهم بيكون للاهل والناس الفي البلد مش للظروف والحاجات الصعبه الموجوده فيه ولن يغير الله مابقوم حتى يغيرو مابأنفسهم واسمح لي كلامك اكثر من رائع لكن لو قعدنا ننمق في الكلام ونشيد بالبلد عمرنا ماحنمشي لي قدام بالعكس الافضل نتكلم بصراحه حتى ولو كانت مره عن الاشياء الغلط الكتييييييييير البتكره في البلد وليس في اهلها عشان الناس تجتهد تغيرها او اضعف الايمان تدعي بالتغيير ليها عموما ده راي وانا مازلت عندو وتأكد انا من الناس المابحب الغربه ولا العيشه بعيد من الاهل لكن زي ماقلت ليك الاهل مش البلد لانو البلد طارده ولو ماكانت طارده ماكان الهسي زكرتهم وقلت مغتربين بقوا مغتربين وربنا يصلح الحال والسوداني يابشمهندس بي طبعو وبي باخلاقو وبالصفات الجميله المعروفه عنو لكن الحاجه الاحنا بنعكسها لي بعضنا ولي العالم كلو غير كده تماما وياريت نقيف مع نفسنا ونغير من الغلط ولو كل زول حاول يغير من الغلط الفيه حتلاقى الوضع كل ماليه ماشي احسن ان شاء الله

مشكوووووووووور مره تانيه على المرور وعلى الكلام الجميل

إنتي يا ناهد أثرتي موضوع مهم شديييييييييييد، والحق يُقال يا باشمهندس سمؤال كلنا بنحب بلدنا بل بنعشقها لأنو إتولدنا وإترعرعنا فيها وعندنا فيها ذكريات جميـــــــــــلة لا تُنسى أبداً إبتداءً من الطفولة مروراً بالمراحل المختلفة من حياتنا، وفوق ده كله عندنا فيها أهلنا وحبايبنا وأصدقائنا، وبنتمنى أن تصبح في مصاف البلاد المتطورة والمتمسكة بحبل الله المتين، ولكن حقيقةً حقيقةً يا باشمهندس واقع بلدنا اليوم سيئ للغاية فقد تغيّرت النفوس للأسوأ وماشة من سيئ لأسوأ، أبسط مثال زي ما ذكرت الباشمهندسة ناهد في موضوعها وتحدثت عن عساكر المرور، أنا شخصياً إتلغدت منهم كتيـــــــــــــــــر وأي سائق عربة لازم لازم لازم يتلدغ منهم، وبالمناسبة الكلام المذكور عن تربُّص عساكر المرور في نهاية شارع إتجاهه واحد قد حصل لي، ففي إحدى المرات كنت خارج من المنطقة الصناعية على كبري الحرية (وأكيد إنت بتعرف المنطقة دي كويس) وكنت شايف هناك في نهاية الشارع عساكر المرور ومعهم ضابط فلمن وصلتهم وقفوني وقالو لي ده شارع إتجاه واحد ولمن سألتهم عن علامة المرور البتوضح إنه ده شارع إتجاه واحد، كانت معلقة في عمود كهرباء وقبل نهاية الشارع بمربوع واحد وقالو لي هو إتجاه واحد من مكان العمود ده، ورغم محاججتي لهم لم يتركوني إلا بعد أن قطعوني الإيصال. تخيَّل هل في عشوائية أكتر من كده؟ علامة مرور معلقة في عمود كهرباء!!!
وغيره وغيره هنالك كثيــــــــــــر من المواقف مع هؤلاء العساكر ربنا يهدينا ويهديهم
وحقيقـــــــــــةً لمن طلعت برة البلد وشفت النظام والعمران والعلم الذي وصلت له البلاد الأخرى تحسرتُ كثيراً على حال بلدي، والله ماشاءالله تبارك الله هنا في ماليزيا تجد تعامل العساكر مع الناس بطريقة أكثر من حضارية، وحتى تعامل الناس مع بعضهم البعض والموظفين تجد فيه الإحترام المتبادل رغم إختلافهم في الدين وفي العرق، فهنا في ماليزيا لديهم ثلاثة أعراق وأديان أول مرة أشوفها (ربنا يهدي الضالين)، كلُّ شيئ فيها بنظام، وكذلك الدراسة والمعينات التدريسية متوفرة بالكامل ماشاءالله تبارك الله
يا باشمهندس أنا لمن رجعت السودان بعد غياب عنه سنة ونصف لم أجد أي تغيير يُذكر في عاصمة بلدنا ناهيك عن الريف والمناطق النائية، وقعدت شهر واحد فقط، تخيّل بعد رجوعي لماليزيا وجدتهم بيبنوا في مجمع سكني كبير والآن خلصوه وبدأوا في غيره، علماً بأن المنطقة التي أدرس بها في ريف ماليزيا وفي منطقة بعيدة جداً جداً عن العاصمة
إمكن تقول لي بلدنا ما فيها إمكانيات، وطبعاً ده غير صحيح نحن والحمدلله بلدنا فيها الإمكانيات وخيرها كتيــــــــــــر لكنها للأسف الشديـــــــــد غير موظفة بالإسلوب الصحيح، وأتمنى أن لا تكون ثرواتنا بتمشي للجيوب، فالله سبحانه وتعالى يُمهل ولا يُهمل
ونسأل الله العلي القدير أن يغيِّر حال بلدنا بعد الحال وأن تصبح في مصاف الدول المتقدمة والمتطورة والمتمسكة بكتابه الكريم وسنة نبيه المصطفى (ص) وأن يُبعد عننا اليهود والأمريكان وأعوانهم، وأن يغيِّر نفوس الذين بهم مرض، إنه على كل شيئٍ قدير وبالإجابة جدير

مشكوووووور على المرور الكريم ويسلم لسانك يادكتور عاصم

أكيـــــــــــد انت في السودان %D8%AC%D8%B2%D8%A7%D9%83%20%D8%A7%D9%84%D9%84%D9%87%20%D8%AE%D9%8A%D8%B1%D8%A7_gif

أكيـــــــــــد انت في السودان %D8%AC%D8%B2%D8%A7%D9%83%20%D8%A7%D9%84%D9%84%D9%87%20%D8%AE%D9%8A%D8%B1%D8%A7_gif

السلام عليكم و رحمة الله تعالى وبركاته
و حمدلله على سلامة العوده ونتمنى ان تكون متواصلة بلا انقطاع
اما بخصوص ( اكيد انت فى السودان ) فحقيقة نتمنى اصلاح الحال

» بلاد السودان
» يوسف الامين فى فى السودان
» محمد ود صفيه عمتي في السودان
» عبدالمجيد الحسين الجلال وصل السودان
» النت (واثاره على المجتمع خاصة السودان)