الموضوع دا يا جماعة عبارة عن قصة...وهي قصة حقيقية حصلت لي لما كنت صغير ( يعني ما من وحي الخيال ) حصلت لما كان عمري 4 أو 5 سنين تقريبا
كانت اول تجربة لي مع موضوع المرسال للدكان ... رسلتني امي الدكان و دا كان اول مرة اترسل فيها الدكان كان التجربة صعبة لما هي محفوفة بالغش من بتاع الدكان او النسيان ( تنسى حاجة و تجي امك تدقك بالبيت) طبعا انا كنت متلهف للتجربة الجديدة دي ... اها غايتو انا مشيت الدكان و اشتريت الحاجات من غير اي خسائر ... كنت طبعا فخور بالانجاز دا و جيت شايل الحاجات دي و راجع البيت اها جمب البيت لقيت لي غنماية في الخور الجمب بيتنا تلوك ليها في كيس دا ما المهم المهم انو كانت بتعاين لي و طبعا لما انا معروف بحرارة القلب و عزة النفس من كنت صغير ماعجبني انو الغنماية تعاين لي كدا و كانها بتستحقرني ...اها قمت ماشي عليها اوريها منو مصطفى دا و فجاة و بدون اي مقدمات قامت الغنماية الغدارة جات جارية علي شكلها فهمت ما كنت ناوي ليهو و قامت ساكاني طبعا انا ماسويت شي غير اني جدعت الكيس الفي يدي و اديت الغنماية ضهري و قمت جاري ( دا ما جبن يا جماعة الحرب خدعة ومعروف الحرب كر و فر ) والغنماية ساكاني طبعا كنت بتحين الفرصة عشان اسيطر على الموقف لكن الغنماية ما ادتني اي فرصة ....اها بقينا على الحال دا انا جاري و هي ساكاني لحد ما جا المنقذ ( ابوي ) وشافني على الحالة دي...طبعا دي كانت اول تجربة لي عشان كدا ناس البيت كانو قلقانين ولما شافوني طولت طلع ابوي عشان يشوفني في الحالة الصعبة دي ...مشعلق في قرون الغنماية ( عليكم الله شفتو ليكم شجاعة زي دي) و الغنماية جارية بي وقام جا ابوي وفكاني منها بعد تحانيس للغنماية و حلا المشكلة البيننا دي وديا غير شوية خسائر ( انا فنيلتي اتشرطت شرطة صغيرة و الغنماية فقدت الكيس الكانت بتلوك فوقو ) ورجعت الخور وشلت كيسي و مشيت البيت .. لكن حسيت بانتصاري بعد ما شفت الغنماية هجرت الشارع دا و ما بقت تجي بيهو ... لكن كمان انا هجرت الطلوع للشارع برضو كفترة نقاهة و ما طلعت تاني الا بعد اسبوعين و بقيت كل ما القى غنماية اسيب ليها الشارع عشان انا عارف لو اشتبكت معاها ما حا يحصل ليها طيب ....... النهــــــــــاية
والقصة ي زي ماقلت ليكم حقيقية